நீரும் நிலமும் மனிதன் வாழ்வில்....பகுதி-5

நீரும் நிலமும் மனிதன் வாழ்வில்....பகுதி-5

இதற்கு முன் உள்ள பகுதியை படிக்க சுட்டியை சுட்டவும்
நீரும் நிலமும் மனிதன் வாழ்வில்....பகுதி-1
நீரும் நிலமும் மனிதன் வாழ்வில்....பகுதி-2
நீரும் நிலமும் மனிதன் வாழ்வில்....பகுதி-3
நீரும் நிலமும் மனிதன் வாழ்வில்....பகுதி-4

நீரையும் நிலத்தையும் பற்றி சொல்லிகொண்டே போனால் முடிவுக்கு வருவது சிரமம்தான், ஆனாலும் இதற்கு மேல் சொல்லிக்கொண்டே போனாலும் அலுப்பு வந்துவிடும். அதனால் இந்த பகுதியை இறுதியாக வைத்துக்கொள்வதுதான் உத்தமம். இருந்தாலும் சமயம் கிடைக்கும் பொழுது மேலும் யோசிக்கலாமே!.....

பூமியில் உள்ள உயிர்கள் தோற்றதிற்கு ஆதாரமே நீர்தான் என்பதில் எந்த மாற்றமும் இல்லை. அதே போல் நீரின் தேவைகள் இன்று அதிகரித்துள்ளது என்பது நமக்கு தெரிந்ததே ( அனுபவித்துக் கொண்டுள்ளோம்). ஒவ்வொரு துளி நீரும் ஏதோ ஒரு உயிர் அணுவை இயக்கிகொண்டுதான் இருக்கின்றது. "ஆக்கமும் பெண்ணாலே அழிவும் பெண்ணாலே" என்ற ஒரு பழமொழி வழக்கில் இருக்கின்றது அதுபோல உயிரின் ஆக்கத்திற்கும் நீரே, உயிரின் முடிவிலும் நீரே என்று எண்ணங்கள் இருக்கின்றது.

எனக்கு ஐந்து வயது இருக்கும்பொழுது என் அம்மாச்சி(அம்மாவின் அம்மா) பத்து காசு கொடுத்தார்கள். என்னிடம் பத்துகாசு கொடுத்ததும் மிக மகிழ்ச்சியாக நான் விளையாடினேன். எனக்கு சின்ன பொருள்களை வாயில் போட்டு விளையாடும் பழக்கம் இருந்திருக்கின்றது, அதேபோல் அந்த பத்து காசையும் வாயில் போட்டு விளையாடும் பொழுது விழுங்கிவிட்டேன். விழுங்கிய காசு தொண்டையில் படுக்கை வசமாக நின்று விட்டது. என்ன செய்தும் காசை எடுக்க முடியவில்லை. மருத்துவமனையில் இரண்டு வாரங்கள் ஓடியது. என் அதிஸ்ட்டம் (தமிழில் சொல்லுங்களேன்) பத்து காசின் ஓரங்களில் வலைவுகள் இருக்கும், அதனால் நீர் ஆகாரங்கள் உள்ளே செல்லமுடிந்தது. அந்த நீர்தான் என்னை இப்பொழுதும் உங்ளுடன் பேச வைத்துள்ளது என்றால் நீரின் முக்கியத்துவம் புரிகின்றது. பின்னர் மருத்துவமனையில் அந்த காசை எடுத்துவிட்டார்கள் என்பது வேறு விடயம்.

வயதானவர்களுக்கு திட உணவுகள் கொஞ்சம் கொஞ்சமாக அவர்களுக்கு செறிமானம் ஆக சிரமம் வந்துகொண்டு இருக்கும். அதனால் அதிகம் திரவ உணவுகளை எடுத்துக்கொள்ளுவார்கள். அதே போல் உயிர் போகும் நிலையில் இருக்கும் வயதானவர்கள் சிறிது பால் அல்லது நீரே ஆகாரமாக கொண்டு சிலநாட்கள் வாழ்வார்கள். அந்த நீரும் நின்று போனால் உறவினர்களுக்கு சொல்லி அனுப்பிவிடுவார்கள். ஒரு மனிதன் வாழ்வில் கடைசி மூச்சு இருக்கும் வரை நீரே ஆதாரமாக இருக்கின்றது. இப்படி மனித வாழ்வில் ஒட்டியே வரும் நீரை நமக்கு பின் உள்ள சந்ததினர்களுக்கு எப்படிப்பட்ட நிலையில் விட்டு செல்கின்றோம் என்பதையும் எண்ணிப்பார்க்க வேண்டியது நம் கடமை.

இயற்கையை நாம் என்னதான் கட்டி காப்பாற்றினாலும் ( அப்படி இல்லை என்பது வேறு விடயம்) அவற்றின் சில மாற்றங்களை நாம் சந்தித்துதான் ஆகவேண்டும். சுனாமி போன்ற மாற்றங்களையும் சந்தித்துக்கொண்டுதான் இருக்கின்றோம். பருவ சூழ்நிலை காரணிகள்தான் ஒரு உயிரின் பரிணாம வளர்ச்சிக்கு காரணமாகின்றது. அப்படிப்பட்ட பரிணாம வளர்ச்சியின் அடிப்படையில்தான் நாம் ஏற்றுக்கொண்ட மனித பாத்திரமும். ஒவ்வோரு காரணிகளின் அடிப்படையில் பரிணாம வளர்ச்சியில் சில மாறுதல்கள் இருப்பதை அறிஞர்கள் கண்டு பிடித்துள்ளார்கள். இன்று நம் குழந்தைகளின் அறிவுத்திரண் நாம் அந்த வயதில் இல்லை என்பதும் உண்மைதானே.

மாறி வரும் பருவக்காலங்கள், உலகின் வெப்பம் அதிகரித்தல், குடிநீரின் பற்றாகுறை இப்படி பல காரணிகளால் நாளைய பரிணாம வளர்ச்சியில் என்ன மாற்றங்களை நாம் (மனிதன்) காண போகின்றோமோ????? யார்கண்டது! மாறிவரும் பருவ காலங்களால் உடலில் உரோமங்கள் அதிகரிக்கலாம். வெப்பத்தின் அதிகரிப்பால் தலையில் கொம்புகள் முளைக்கலாம். குடிநீரின் பற்றாகுறையால் ஒட்டகம் போல முதுகில் நீர்ப்பையுடன் பிறக்கலாம். கணனியில் உற்கார்ந்து உற்கார்ந்து கூனி குறுகி மீண்டும் நான்கு கால்களில் நடக்கலாம்..

கவலையை விடுங்கள் இப்படிபட்ட பரிணாம மாற்றங்கள் காண பல ஆயிரம் ஆண்டுகள் ஆகலாம்... இருந்தாலும் நாம் இயற்கை கொடுத்த கொடைகளை நாம் தீண்டாதவரை இயற்கையும் நமக்காகவே இருக்கும்.... இயற்கை இயற்கையாக

அதற்காக மரங்களை எல்லாம் வெட்டி சாய்த்து விட்டு பசுமை புரட்சியை பற்றி பேசவேண்டாம். காடுகள் மழையின் ஆதரமாக இருக்கின்றது. எல்லாவற்றுக்கும் அரசாங்கத்தை குறைசொல்வதை விட்டுவிட்டு நாமும் குறைந்து வரும் நீர் வளத்தை காப்பாற்ற ஏற்ற நடவடிக்கை எடுக்கலாம். நாம் வீணாக செலவழிக்கும் நீரின் ஒரு துளியும் நாளைய உலகின் சொத்து என்பதை கவணத்தில் கொள்வது நல்லது. வீட்டு தோட்டங்களின் இன்றைக்கு ஒரு மரமாவது நட்டுவையுங்கள். வீட்டின் தோட்டத்தில் காரைத்தளங்களை எடுத்துவிட்டு புள்வெளிகளை உருவாக்குங்கள் மழைநீர் சேமிக்கப்படும். என்னை பொருத்தவரை மனிதன் நினைத்தால் கல்லும் கவிபாடும்! கன இரும்பும் நடனமாடும்!..... ஆம் தோழர்களே! நீரை சேமித்து நாளைய உலகை வளமாக்குவோம்!....

தினமலரில் வந்த சில ஆவணப்புகைப்படம்....



ஒரு காணோளி பகிர்வு...




என்று அன்புடன்
ஆ.ஞானசேகரன்.

(அடுத்து எதைப்பற்றி அலசல் ஆரம்பிக்கலாம் என்று சொல்லுங்கள் நட்புகளே!)

நீரும் நிலமும் மனிதன் வாழ்வில்....பகுதி-2

நீரும் நிலமும் மனிதன் வாழ்வில்....பகுதி-2

இதற்கு முன் உள்ள பகுதியை படிக்க சுட்டியை சுட்டவும்
நீரும் நிலமும் மனிதன் வாழ்வில்....பகுதி-1

குடிநீரும் அதன் அவசியமும் சொல்ல தேவையில்லை. தாவரங்கள் முதல் மனிதன் வரை உயிர்வாழ மிக அவசியமானதாகும். மனிதனின் உடலில் பிரதான சக்தி நீராக இருக்கின்றது.


மனிதன் குடிப்பதற்கும் குளிப்பதற்கும் தேவை நீர். நம் பூமியானது நான்கில் மூன்று பகுதி நீரால் சூழப்பட்டிருந்தாலும். மனிதனின் தேவைக்கு மழை நீரையும், நிலத்தடி நீரை பயன்ப்படுத்த வேண்டியுள்ளது. கடல் நீர் உப்புத்தன்மையும் கடினதன்மையும் உள்ளதால் நேரடியாக விவசாயத்திற்கோ இல்லை குடிநீராகவோ பயன்படுத்த முடியவில்லை. கடல்நீரை குடிநீராக்கும் திட்டங்கள் இருந்தும் நடைமுறைக்கு இன்னும் வரவில்லை. இதன் செலவினங்கள் அதிகம்.. ஒரு வேடிக்கையான விடயம் என்னவென்றால் காட்டாற்று தண்ணீரையும் நதிநீரையும் சேமிக்காமல் கடலில் கலக்க செய்துவிட்டு கடல்நீரை குடிநீராக்கும் திட்டங்களை தீட்டுகின்றார்கள். உபரியாக கடலில் கலக்கும் தண்ணீரை சேமித்து குடிநீராக்கும் திட்டங்களை கொண்டு வரலாமே!

மனிதன் நாகரிகம் மற்றும் விஞ்ஞான வளர்ச்சி என்றால் இந்த நூறு வருடங்களை எடுத்துகொள்ளலாம். அதிலும் அதீத வளர்ச்சி என்றால் ஒரு 50 வருடங்களை சொல்லலாம். அந்த 50 வருடங்களில் 40 வருடங்களை நான் கடந்து வந்ததில் எனக்குள் மகிழ்ச்சியே. நான் கண்ட குடிநீர் மாற்றங்களையும் பிரச்சனைகளையும் சொன்னாலே போதுமானதாக இருக்கலாம்.

ஆதிகால மனிதன் நாடோடியாக காடுகளில் சுற்றி திரிந்துக் கொண்டும் கண்ணில் கண்ட பழங்கள் கிழங்குகளை உண்டும் வாழ்த காலங்களை தாண்டி, என்று மனிதன் குழுக்களாக ஓர் இடத்தில் தங்கி வாழத்தொடங்கினானோ அன்றுதான் மனித நாகரிகமும் வளர்ச்சிக் கண்டது. அதேபொல் அவனால் உண்டாக்கப்பட்ட கழிவுகளும் பிரச்சனைகளாக உருவாகிவிட்டது.

இயற்கையான கழிவுகளை இயற்கையே சமன் செய்துவிடும். ஆனால் மனிதன் நாகரிக வளச்சிப்பாதையில் உண்டான தொழிற்ச்சாலை வேதியியல் கழிவுகள் நதியிலும் ஆற்று படுகைகளிலும் கலந்து விடப்பட்டன. இதனால் நதிநீரும் மாசுப்பட்டது அதனைச் சார்ந்து நிலத்தடிநீரும் உவர்ப்பானது. இதன் காரணமாக பல நோய்களும் வர ஆரம்பித்துவிட்டது. 65 சதவிகிதம் நோய்கள் நீரினால் பரவுகின்றது என்றால் பார்த்துக்கொள்ளுங்கள்.

நாம் வரலாற்று பாடங்களில் படித்துள்ளோம், குளங்களை வெட்டினார் அணைகள் கட்டினார்கள் ஆனால் இன்று நடப்பது குளங்கள் தோரும் துண்டு போட்டு வீடுகள் கட்டினோம். தப்பி தவறி இருக்கும் குளங்கள் தூரு வார எந்த நடவடிக்கையும் எடுக்கவில்லை என்பதுதான் இன்றைய நிலை.

நான் சிறுவனாக இருக்கும் பொழுது வயல்களில் களைப்பறிக்கும் என் பாட்டிக்கு சோறு எடுத்து செல்வதுண்டு. அப்பொழுது குடிக்க தண்ணீர் எடுத்து செல்வதில்லை வயல்வெளிகளில் உள்ள வாய்க்காலில் வரும் தண்ணீரை மேலாக வரும் தூசிகளை நீக்கிவிட்டு ஒரு குவளையில் எடுத்து குடிப்பார்கள். நானும் குடித்துள்ளேன் அந்த தண்ணீரின் சுவையை இன்று நான் சுவைக்கவில்லை. மழை நீர் மற்றும் காட்டாற்று தண்ணீரை சேமித்து வைப்பதுதான் அந்த குளம். குளத்தின் நீர் விவசாயத்திற்கு பயன் படுத்தப்படுகின்றது. சிறு சிறு மாசுகள் கலந்திருப்பினும் இயற்கையே அதை சமன் படுத்திவிடும். ஆனால் இன்று மனித கழிவுகளும் பக்கத்து தொழிச்சாலையில் வரும் கழிவுகளும் நேரடியாக கலந்துவிடுகின்றது. இதனால் அந்த ஊரின் நிலத்தடிநீரும் உவர்ப்பாகிவிடுகின்றது.

மனித நாகரிக வளர்ச்சிதான் இந்த சீர்கேடுக்கு காரணம் என்று சொல்வதிற்கில்லை. நாகரிக வளர்ச்சியையும் நாம் ஏற்றுகொள்ளதான் வேண்டும். அதே வேலையில் தொலை நோக்குப்பார்வையில் சில நடவடிக்கைகளும் நாம் மேற்கொண்டால்தான் இந்த பூமியை நாளைய தலைமுறைக்கும் விட்டு செல்ல முடியும்.

தனிப்பட்ட மனிதனின் முன்னேற்ற வழிகளை அவனால் பார்த்துக்கொள்ளமுடியும். பார்த்துக்கொள்ளதான் வேண்டும். ஆனால் குளங்களை வெட்டுவது, அவற்றை தூர்வாறுவது, நதிகளின் போக்கை பயன்படும்படி நடவடிக்கை எடுப்பது, அணைகள் கட்டி பாசன வசதியை அதிகப்படுத்துவது எல்லாம் நாம் நமக்காக ஏற்படுத்திய அரசுதான் செய்ய வேண்டும். அதுதான் அரசின் தலையான கடமையும் கூட. நாம் காண்பது இலவச தொலைக்காட்சிப் பெட்டி வழங்குதல், இலவச வேட்டி சேலை வழங்குதல்.

முன்பெல்லாம் ஊர் திருவிழாக்களில் தண்ணீர் பந்தல் வைப்பார்கள். எனக்கு தெரிந்து கோடைக்காலங்களில் பேருந்து நிலையங்களிலும் மக்கள் கூடும் இடங்களிலும் தண்ணீர் பந்தல் ஒரு சேவையாக செய்வார்கள். ஆனால் இன்று குடிநீரை காசு கொடுத்து வாங்கும் நிலைக்கு தள்ளப்பட்டுள்ளோம் என்பதுதான் இன்றைய மிகப்பெரிய கவலை. இந்த நிலை வெறும் பத்தாண்டுகளில் தான் நடந்துள்ளது என்றால் நாம் எதோ ஒன்றை தவறவிட்டுவிட்டோம் என்பதுதான் உண்மை.

எங்கள் ஊரில் ஒரு குளம் ஒன்று இருக்கும் . இந்த குளத்தில் மழையின் நீரை தேக்கி வைக்கப்பட்டிருக்கும் . இந்த குளத்தை குடிநீருக்காகவே பயன்படுத்துவார்கள். இந்த நீர் பார்ப்பதற்கு செம்மண் நிறத்தில் இருக்கும் ஆனால் அதன் சுவை தீத்திப்பாக இருக்கும். இந்த செம்மண் நிற தண்ணீரை மண்பாண்டத்தில் எடுத்துவந்து தேத்தாங் கொட்டையை பானையினுள் சிறிது நேரம் உரசுவார்கள் செம்மண் நிறம் திரிந்து வெளிராகும். பின்பு ஒரு துணியில் வடிக்கட்டி குடிநீராக பயன்படுத்துவார்கள். எங்கள் ஊருக்கு வருபவர்கள் தோத்தாங்கொட்டை தண்ணீர் கொடுங்கள் என்று கேட்டு வாங்கி குடிப்பார்கள் அந்த அளவிற்கு சுவையாக இருக்கும். காலமும் நாகரிக வளர்ச்சியும் இப்படிப்பட்ட நிகழ்வுகளை மறக்கடிக்க செய்துவிட்டது என்று நினைக்கின்ற பொழுது கொஞ்சம் மனம் கலங்கத்தான் செய்யும்.

காலங்களின் வளர்ச்சினால் மனிதன் பெரிய பெரிய கட்டிடங்களிலும் தனித்தனி வீடுகளிலும் வசிக்க ஆரம்பித்தான். அதே போல் வீடுகளில் தனியாக குளியல் அறை, கழிவறை என்ற அமைப்புக்கு சென்றான். (இன்னும் கழிவறை இல்லா வீடுகளும் இருக்கு அதே போல் திறந்த வெளியில் மலம் போக்கும் நிலையும் இருக்கு என்பதும் கசப்பான உண்மை) இதனால் தண்ணீரின் பயன்பாடும் அதிகரித்தது அதனுடன் அதன் கழிவுகளும் அதிகரித்தது. இப்படி வரும் கழிவுகளை முறையற்ற நிலையில் மறுபடியும் நதிகளிலும் ஆறுகளிலும் கலந்துவிடுவதால் வந்த நிலைதான் இன்றைய சுகாதரமற்ற குடிநீருக்காண காரணங்கள்.

தாகம் என்று வருபவர்களுக்கு தண்ணீர் கொடுப்பதும் . தண்ணீர் கொடுக்கும் வாய்ப்பு கிடைத்தற்கு மகிழ்வதும் மக்களின் பண்பாடாக இருந்தது. ஆனால் இன்று பணம் கொடுத்து வாங்கி தண்ணீர் குடிக்க வேண்டிய நிலை. இவற்றிக்காண காரணங்களை வரும் இடுகைகளில் யோசிப்போம்.....

அதுவரை அன்புடன்
ஆ.ஞானசேகரன்.

என் இடுகைக்கு பின்னர் வந்த தினமலர் செய்தி... கண்டிப்பாக படித்து தெரிந்துகொள்ள வேண்டியவை சுட்டியை அமுக்கி படிக்கவும்..

அழிவின் விளிம்பில் கொடைக்கானல் ஏரி

நீரும் நிலமும் மனிதன் வாழ்வில்.... பகுதி-1

நீரும் நிலமும் மனிதன் வாழ்வில்....பகுதி-1

நீர் இல்லா நிலையை இந்த பூமியில் நினைத்துக்கூட பார்க்க முடியாது. அதேபோல் நீர் இல்லாமல் உயிரின் ஒரு அணுவும் அசையாது என்பதும் உண்மையே. பல்லாயிரம் ஆண்டுகளுக்கு முன் நம் பூமி வெறும் பாறையாகதான் இருந்ததாக அறிவியல் சொல்கின்றது. அப்பொழுது எந்த உயிர்களும் இல்லை. முதலில் செடி கொடிகள்தான் இந்த பூமியை கண்ட உயிர் என்றே சொல்கின்றார்கள். இதற்கெல்லாம் மூலமாக இருப்பது நீர். இந்த செடி கொடிகள்தான் சுவாசித்தலின் மூலம் ஆக்ஸிசனை (O2) வெளியிட்டு பூமியில் ஆக்ஸிசனை நிறப்பியது. இந்த ஆதாரம்தான் மனிதனை போல விலங்கினங்கள் உருவாக காரணமாக இருந்தது.

பூமி பந்தின் நிலப்பரப்பு தற்பொழுது இருப்பது பல மாற்றங்களுக்கு பிறகு வந்த நிலைதான். அதற்கு முன் இந்தியா ஆசியா கண்டத்திலேயே இல்லை ஆப்ரிகாவுடன் இணைந்திருந்தது. இயற்கையின் பல மாற்றங்களுக்கு பின் உருவானதுதான் இன்றைய உலகம். பூமி பந்தின் மைத்தியில் வயிற்று பகுதியை தவிர வடக்கிலும் தெற்கிலும் எல்லாமே பனி பாறைகள்தான். இவற்றை பனி பாலைவனங்கள் என்றே சொல்லலாம்.

இப்படிப்பட்ட பனிப் பாலைவனங்களை மனிதன் வாழ்வதற்கு தவிர்க்கப்பட்டது. இயற்கை செய்த விளையாட்டில் சுமார் 17,000 ஆண்டுகளுக்கு முன் ஏற்பட்ட வெப்பஉயர்வு பூமி பந்தின் ஒரு திருப்பு முனையாக அமைந்து விட்டதாக அறிவியலர்கள் கூறுகின்றார்கள். அந்நாளில் ஏற்பட்ட வெப்ப உயர்வு உலகின் பருவநிலையில் ஒரு மாபெரும் மாற்றத்தை உருவாக்கிவிட்டது. இந்த நிகழ்வுதான் நாகரிகத்தின் ஆதாரமாக அமைந்துவிட்டது என்றால் மிகையாகாது.

அந்த பருவநிலை மாற்றங்கள் உலகில் தொடர்ந்தது. அந்த மாற்றம்தான் உலகை மாற்றியமைக்க முதன்மையான காரணமாக அமைந்துவிட்டது. தெற்கிலும் வடக்கிலும் உள்ள பனிப்பாறைகள் வெப்ப உயர்வு காரணமாக உருக ஆரப்பித்தது. பனி உருகி நீராகியது. நீர் நதிகளாகி கடலில் கலந்தது. அதனால் கடல்மட்டம் உயர்ந்தது.

வெப்ப அதிகரிப்பால் கடல் நீர் நீராவியாக மாறி மேலே கிளம்பி பின் மழையாக கொட்டியது. இதனால் ஏரி , குளங்கள் நதிகளாக ஓட ஆரம்பித்தது. இந்த நதிக்கரைதான் மனித நாகரிக வளர்ச்சியின் ஆதாரம். இந்த நதிக்கரை நாகரிகம்தான் மனித வரலாற்றை மாற்றியமைக்கப்பட்டது என்றே சொல்லலாம். இதற்கு பின் பருவநிலை மாற்றங்கள் உருவாகின.

இந்த பனி உருகல் சுமார் 3000 ஆண்டுகள் தொடர்ந்ததாக கணக்கிடப்படுகின்றது. இதனால் நதிகளும் ,கிளை நதிகளும் உருவாகின அதனோடு மனித நாகரிகமும் வளர்ச்சிப்பெற்றது. அதே போல் கடல் மட்டம் உயர்வால் பல நிலப்பரப்புகள் துண்டிக்கப்பட்டது, பல நீரினால் மூழ்கடிக்கப்பட்டது. நதிகள் போக்கால் நிலப்பரப்பும் நகர்த்தப்பட்டது. இப்படிப்பட்ட நிகழ்வுக்கு பின் உருவானதுதான் இன்றைய உலகப்படத்தில் காணும் உலகம். நதிகள் பொதுவாக மேற்கிலிருந்து கிழக்காக ஓடி கடலில் கலக்கும் இதற்கு பூமி பந்தின் வலம் சுழற்சியே காரணம்.

பூமியில் நான்கில் மூன்று பங்கு நீரால் சூழப்பட்டுள்ளது. இதில் கடல் நீர் உவர்ப்பாக இருக்கும். நீருக்கு சுவையும் மணமும் கிடையாது என்றாலும் அந்த நீர் இருக்கும் நிலத்தின் தன்மையைக்கொண்டு சுவையும் மணமும் இருக்கும்.

உயிர்கள் வாழ நீர் மிக முக்கியம் . நீரை நன்னீர், கடினநீர் எனப்பிரிக்கலாம். நன்னீரில் வேதி உப்புகளும் திண்ம உலோகங்களும் குறைவாக இருக்கும். இந்த நீர்தான் மனிதன் குடிப்பதற்கும் வேளாண்மைக்கும் பயன்படுத்தப்படுகின்றது.

நன்னீர் எங்கெல்லாம் கிடைக்கின்றது? நதி, ஏரி,குளம், ஊற்று, நிலத்தடியில், கேணிகள் மூலம் கிடைக்கின்றது.

நன்னீர் எப்படி உருவாகின்றது? பனி உருகுதல் மூலமும், மழையினாலும் நன்னீர் கிடைக்கின்றது.

நன்னீரின் நிலை என்ன? நன்னீர் மூன்று நிலைகளில் காணலாம். நீர்,பனிகட்டி,நீராவி ஆகும். இது மூன்றையும் ஒரே நேரத்தில் காண்பது அரிது. ஆனால் 4 டிகிரி செல்சியசில் இந்த மூன்றையும் காணலாம்..!
இப்படிப்பட்ட நன்னீர்தான் நாம் உயிர்வாழ பயன்ப்படுகின்றது. கடலிருந்து சூரியவெப்பத்தால் ஆவியாகி மேலே சென்று பின் குளிர்ந்து மழையாக பெய்கின்றது இதில் எந்த மாற்றமும் இல்லை. அப்படியிருந்தும் குடிநீருக்காக நாம் இன்று சிரமப்படுவதேன்?

இயற்கையாக கிடைக்கும் நன்னீர் மற்றும் நிலத்தடிநீருக்கு மனிதனால் ஏற்பட்ட தீங்குதான் என்ன? இவற்றையெல்லாம் சிந்திப்பதற்குதான் இந்த இடுகையின் நோக்கம். அன்று ஏற்பட்ட வெப்ப உயர்வால் ஏற்பட்ட மாற்றம்தான் இன்றைய நாகரிகம். ஆனால் இன்று மனிதனால் ஏற்பட்ட இயற்கை அழிவால் ஏற்பட்ட மாற்றத்தால் உலகம் வெப்பம் சிறிது உயர்த்தப்பட்டுள்ளது, மேலும் வெப்பம் உயர்ந்துகொண்டே இருக்கின்றது. இவற்றால் நன்மையா? தீமையா?. பொதுவாக மனித உயிர்களுக்கு தீமைதான் இதை தடுக்க வேண்டும் என்று சொல்கின்றது பொது அறிவியல். இன்றைய நிலையில் பருவநிலை மாற்றங்களை நாம் எதிர்கொண்டு வருகின்றோம். நீரினால் நோய்கள், குடிநீருக்காக போராட்டங்கள். காசுக்கு வாங்கி நீரை குடிக்கும் நிலை மனிதனுக்கு மனிதனே காரணமாகின்றான். நீரை தனி ஒரு பொருளாக உருவாக்கவும் முடியாது என்பதுதான் உண்மை.

2025ல் ஆசியா ஆப்பிக்கா நாடுகளில் கடுமையான குடிநீர் பஞ்சம் உருவாகலாம் என்று கணக்கிடப்படுகின்றது. ஏன் நீருக்காக ஒரு நாட்டின் மேல் போர் தொடுக்கும் காலமும் வரலாம் என்று எச்சரிக்கை விடப்படுக்கின்றது. இருந்தாலும் மக்களிடம் எந்த விதமான விழிப்புணர்வும் வரவில்லை என்பதுதான் கவலைக்கிடமான ஒன்று. வளர்ந்துவரும் நாடுகள் கூட இதைப்பற்றி பெரிதுப்படுத்திக்கொண்டதாக தெரியவில்லை. வளர்ந்த நாடுகளோ நமக்கென்ன என்ற நிலையில் இருக்கின்றது.

குடிநீர் எப்படி மாசுப்படுகின்றது? நிலத்தடிநீர் குறைய காரணம் என்ன? உலக வெப்ப மயமானதிற்கும் குடிநீருக்கும் தொடர்பு உண்டா? இதை தடுக்க நாம் செய்ய் வேண்டிய கடமை என்ன? என்பதை பற்றி அடுத்து வரும் இடுகைகளில் பார்க்கலாம்.

அதுவரை அன்புடன்
ஆ.ஞானசேகரன்.

(சில ஆதாரங்கள் மதன் எழுதிய கிமு. கிபி தொடரில் எடுக்கப்பட்டது.)